ಕೆಂಪು ಸೂರ್ಯ ಚರಮ ಗೀತೆ ಹಾಡುವ ಕಾಲ ದೂರವಿಲ್ಲ
ಆಕ್ರೋಶ ಸಾಮ್ರಾಜ್ಯ ನುಂಗುವ ದೈತ್ಯ ತೆರೆಯಾಗುವ ಕಾಲ ದೂರವಿಲ್ಲ
ತುಳಿವ ಹೆಜ್ಜೆ ಸೀಳಿ ಬರುವ ಮೊನಚು ಮೊಳೆ ಅವರು
ತುಕ್ಕು ಉದುರಿ ಸಾಣೆಗೊಂಡರೆ ತರಿದುಹಾಕುವ ಕಾಲ ದೂರವಿಲ್ಲ
ಸರಳುಗಳ ಬೆಸುಗೆ ಸಡಿಲುಗೊಂಡರೆ ದುರ್ದೈವಕೆ
ರೆಕ್ಕೆಮುರಿದ ಹಕ್ಕಿ ಡೇಗೆಯಾಗಿ ಕುಕ್ಕಿಹಾಕುವ ಕಾಲ ದೂರವಿಲ್ಲ
ಒಗ್ಗಟ್ಟಿನ ಹೂಂಕಾರ ಕಿವಿಗೆ ಕಾದ ಸೀಸ ಹೊಯ್ದಾವು
ಕಿಚ್ಚುಗಣ್ಣಲಿ ಡುರು ಡುರುಗರೆದುಬರುವ ಕಾಲ ದೂರವಿಲ್ಲ
ಕಾಲ್ ಸಪ್ಪಳಕೆ ಎದೆ ಝಲ್ಲೆಂದು ಮೈ ಬೆವರಿಬಿಟ್ಟಾತು
ಅಯ್ಯಾ ಎಂದವರು ಎಲವೋ ಎಂದು ಅಬ್ಬರಿಸಿಬರುವ ಕಾಲ ದೂರವಿಲ್ಲ
ಎದೆಗರ್ಭದ ಲಾವ ಆರಿಸಲು ಕೊಂಚ ತೇವ ಉಳಿಸಿಕೊಳ್ಳಿ
ಒಡೆದ ಗಾಜೆಲ್ಲ ವಜ್ರದ ಚೂರಾಗಿ ತಿವಿಯಬರುವ ಕಾಲ ದೂರವಿಲ್ಲ
ಅವರನು ಸುಡುವ ಬೆಂಕಿ ನಿಮಗೆ ಜ್ಯೋತಿಯಾಯ್ತಲ್ಲ
ತಾಯ್ನೆಲ ಮಾರುವ ದಲ್ಲಾಳಿಗಳ ಬೂದಿಮಾಡುವ ಕಾಲ ದೂರವಿಲ್ಲ
ಜ್ಯೋತಿ ಬಿ ದೇವಣಗಾವ.