ನಮ್ಮ ಪ್ರಕೃತಿ ಎಂಬುದು ದೊಡ್ಡ ರಹಸ್ಯದ ಮೂಟೆ… ಅದೆಷ್ಟೋ ವಿಸ್ಮಯಗಳನ್ನು ತನ್ನೊಡಲಿನಲ್ಲಿ ಬಚ್ಚಿಟ್ಟುಕೊಂಡಿರುವ ಪ್ರಕೃತಿ ಯಾವತ್ತೂ ಜನರನ್ನು ಚಕಿತಗೊಳಿಸುವುದರಲ್ಲಿ ಹಿಂದೆ ಬೀಳುವುದೇ ಇಲ್ಲ. ಈ ರೀತಿಯ ಪ್ರಕೃತಿಯ ವೈಚಿತ್ರ್ಯದ ಹಲವು ವಿಡಿಯೋಗಳು ಆಗಾಗ ಸೋಶಿಯಲ್ ಮೀಡಿಯಾದಲ್ಲೂ ವೈರಲ್ ಆಗುತ್ತಲೇ ಇರುತ್ತವೆ. ಇಂತಹ ದೃಶ್ಯಗಳು ಅರೆಕ್ಷಣದಲ್ಲಿ ನಮ್ಮನ್ನು ಅಚ್ಚರಿಗೊಳಿಸುತ್ತದೆ. ಸದ್ಯ ಅಂತಹದ್ದೇ ಒಂದು ವಿಡಿಯೋ ವೈರಲ್ ಆಗುತ್ತಿದೆ.
ಇದು ಇದ್ದಕ್ಕಿದ್ದಂತೆಯೇ ಭೂಮಿ ಮೇಲೆ ಬಂದಂತೆ ಕಾಣುವ ಅಚ್ಚರಿಯ ದೃಶ್ಯ. ಈ ದೃಶ್ಯ ಎಲ್ಲರಲ್ಲೂ ಕುತೂಹಲ ಮೂಡಿಸದೇ ಇರಲು ಸಾಧ್ಯವೇ ಇಲ್ಲ. ಹರಿಯಾಣದಲ್ಲಿ ಸೆರೆಯಾದ ದೃಶ್ಯ ಇದೆಂದು ಹೇಳಲಾಗುತ್ತಿದೆ. ಸ್ಥಳೀಯರು ಸೆರೆ ಹಿಡಿದಿರುವ ಈ ವಿಡಿಯೋ ಕ್ಲಿಪ್‌ನಲ್ಲಿ ನೀರಿನಲ್ಲಿ ಮುಳುಗಿರುವ ಪ್ರದೇಶವು ಇದ್ದಕ್ಕಿದ್ದಂತೆಯೇ ಮೇಲೆ ಬರುವಂತೆ ಕಾಣುವ ದೃಶ್ಯವಿದೆ. ಈ ದೃಶ್ಯವನ್ನು ನೋಡುವಾಗಲೇ ಅಚ್ಚರಿಯಾಗುತ್ತದೆ.
ಜಗತ್ ವಾನಿ ಎಂಬವರು ತಮ್ಮ ಫೇಸ್‌ಬುಕ್ ಖಾತೆಯಲ್ಲಿ ಹಂಚಿಕೊಂಡಿರುವ ವಿಡಿಯೋ ಕ್ಲಿಪ್ ಇದು. 1.58 ಸೆಕೆಂಡುಗಳ ಈ ಕ್ಲಿಪ್‌ನಲ್ಲಿ ನೀರಿನಿಂದ ಆವೃತ್ತವಾದ ಪ್ರದೇಶವು ಇದ್ದಕ್ಕಿದ್ದಂತೆ ಏರಲು ಪ್ರಾರಂಭಿಸುತ್ತದೆ. ಇದನ್ನು ಕಂಡು ಸ್ಥಳೀಯರು ಒಂದು ಕ್ಷಣ ಭಯಭೀತರಾಗುತ್ತದೆ. ಜೊತೆಗೆ, ಅಚ್ಚರಿಯಿಂದ ಈ ವಿಡಿಯೋವನ್ನು ಸೆರೆ ಹಿಡಿಯುತ್ತಾರೆ. ಈ ವಿಡಿಯೋವನ್ನು ಸೆರೆ ಹಿಡಿಯುತ್ತಿದ್ದ ವ್ಯಕ್ತಿ ಕೂಡಾ ಭಯದಿಂದ ಎಲ್ಲರನ್ನೂ ಹಿಂದೆ ನಿಲ್ಲುವಂತೆ ಹೇಳುವುದು ಕೂಡಾ ಕೇಳಿಸುತ್ತದೆ.
ಈ ದೃಶ್ಯ ಯಾವಾಗ ಸೆರೆಯಾಗಿದ್ದು ಎಂಬುದು ಸ್ಪಷ್ಟವಾಗಿಲ್ಲ. ಆದರೆ, ಈ ಕುತೂಹಲಕಾರಿ ದೃಶ್ಯವನ್ನು ಎಲ್ಲರೂ ಬಲು ಅಚ್ಚರಿಯಿಂದಲೇ ನೋಡುತ್ತಿದ್ದಾರೆ. ಸಹಜವಾಗಿಯೇ ಈ ವಿಡಿಯೋ ಎಲ್ಲರನ್ನೂ ಒಂದು ಕ್ಷಣ ಭಯಭೀತರನ್ನಾಗಿಸುವಂತಿದೆ. ಜೊತೆಗೆ, ನೆಟ್ಟಿಗರು ಕೂಡಾ ಭೂಮಿ ಹೀಗೆ ಮೇಲೆ ಬರಲು ಕಾರಣವೇನು ಎಂಬುದರ ಬಗ್ಗೆ ಚರ್ಚೆಯಲ್ಲಿ ತೊಡಗಿದ್ದಾರೆ.
