ಒಟ್ಟು ಮೂರು ಸುತ್ತಿನ ಸ್ಪರ್ಧೆಯಲ್ಲಿ ಭಾರತದ ಚಾಂಪಿಯನ್‌ ಬಾಕ್ಸರ್‌ ಮೇರಿ ಕೋಮ್ ಎರಡು ಸುತ್ತುಗಳನ್ನು ಗೆದ್ದಿದ್ದರು. ಆದರೆ, ಒಟ್ಟು ಅಂಕಗಳ ಅಂತರದಲ್ಲಿ ಎದುರಾದ ಅಲ್ಪ ಹಿನ್ನಡೆ ಪರಿಣಾಮ ಟೋಕಿಯೋ ಒಲಿಂಪಿಕ್ಸ್‌ನಲ್ಲಿ ಮಹಿಳೆಯರ 51 ಕೆ.ಜಿ. ವಿಭಾಗದಲ್ಲಿ ತಮ್ಮ ಹೋರಾಟ ಅಂತ್ಯಗೊಳಿಸಿದ್ದಾರೆ.
ಗುರುವಾರ ನಡೆದ ಪ್ರಿಕ್ವಾರ್ಟರ್‌ ಫೈನಲ್ ಪಂದ್ಯದಲ್ಲಿ ಜಿದ್ದಾಜಿದ್ದಿನ ಪೈಪೋಟಿ ನಡೆಸಿದ ಕೋಮ್, ರಿಯೋ ಒಲಿಂಪಿಕ್ಸ್‌ನಲ್ಲಿ ಕಂಚಿನ ಪದಕ ಗೆದ್ದಿರುವ ಕೊಲಂಬಿಯಾದ ಬಾಕ್ಸರ್‌ ಇಂಗ್ರಿಟ್‌ ಲೊರಿನಾ ವೆಲೆನ್ಸಿಯಾ ಎದುರು ಸೋಲನುಭವಿಸಿದರು.
“ನನಗೆ ಗೊತ್ತಿಲ್ಲ ಏನಾಯಿತು ಎಂದು. ಮೊದಲ ಸುತ್ತಿನಲ್ಲಿ ಇಬ್ಬರೂ ಕೂಡ ತಂತ್ರಗಾರಿಕೆಗಳನ್ನು ಅರಿತುಕೊಳ್ಳುವ ಪ್ರಯತ್ನ ಮಾಡುತ್ತಿದ್ದೆವು. ನಂತರದ ಎರಡೂ ಸುತ್ತುಗಳನ್ನು ನಾನು ಗೆದ್ದಿದ್ದೇನೆ,” ಎಂದು 38 ವರ್ಷದ ಅನುಭವಿ ಹಾಗೂ ವಿಶ್ವ ದಾಖಲೆಯ 6 ಬಾರಿಯ ವಿಶ್ವ ಚಾಂಪಿಯನ್‌ ಬಾಕ್ಸರ್‌ ಮೇರಿ ಕೋಮ್ ಹೇಳಿಕೊಂಡಿದ್ದಾರೆ.
ಮೊದಲ ಸುತ್ತಿನಲ್ಲಿ ಭಾರತೀಯ ಬಾಕ್ಸರ್‌ 1-4 ಅಂತರದಲ್ಲಿ ಹಿನ್ನಡೆ ಅನುಭವಿಸಿದ್ದರು. ಐದು ತೀರ್ಪುಗಾರರಲ್ಲಿ 4 ಮಂದಿ 10-9 ಅಂಕಗಳನ್ನು ವೆಲೆನ್ಸಿಯಾ ಅವರ ಪರವಾಗಿ ಘೋಷಿಸಿದ್ದರು. ನಂತರದ ಎರಡೂ ಸುತ್ತುಗಳಲ್ಲಿ ಭಾರತೀಯ ಬಾಕ್ಸರ್‌ಗೆ 3-2ರ ಮೇಲುಗೈ ಲಭ್ಯವಾಯಿತು. ಆದರೆ, ಒಟ್ಟು ಅಂಕಗಳಲ್ಲಿ ಕೊಮ್‌ಗೆ ಹಿನ್ನಡೆ ಇದ್ದ ಕಾರಣಕ್ಕೆ ಕೊಲಂಬಿಯಾದ ಬಾಕ್ಸರ್‌ ಗೆದ್ದಿರುವುದಾಗಿ ಘೋಷಿಸಲಾಯಿತು. ಕೊನೇ ಸುತ್ತಿನಲ್ಲಿ ಕೋಮ್‌ಗೆ 4-1 ಅಂತರದ ಗೆಲುವು ಸಿಕ್ಕಿದ್ದರೆ ಜಯ ತಮ್ಮದಾಗಿಸಿಕೊಳ್ಳುತ್ತಿದ್ದರು.
ಬಹು ಬಾರಿಯ ಏಷ್ಯನ್ ಚಾಂಪಿಯನ್‌ ಆಗಿರುವ ಮೇರಿ ಕೋಮ್ 2012ರ ಲಂಡನ್ ಒಲಿಂಪಿಕ್ಸ್‌ನಲ್ಲಿ ಕಂಚಿನ ಪದಕ ಗೆದ್ದ ಸಾಧನೆ ಮಾಡಿದ್ದಾರೆ. ಇದೀಗ ಕೊಲಂಬಿಯಾ ಬಾಕ್ಸರ್‌ ವಿರುದ್ಧ 2-3 ಅಂತರದ ಸೋಲಿನೊಂದಿಗೆ ಅವರ ಒಲಿಂಪಿಕ್ಸ್‌ ಅಭಿಯಾನವನ್ನೂ ಅಂತ್ಯಗೊಳಿಸಿದ್ದಾರೆ. ಅವರ ವೃತ್ತಿಬದುಕಿನ ಅಂತಿಮ ಒಲಿಂಪಿಕ್ಸ್‌ ಇದಾಗಿದೆ.
ಜಿದ್ದಾಜಿದ್ದಿನ ಹೋರಾಟ ನಡೆಸಿ ದಣಿದಿದ್ದ ಕೋಮ್ ತಾವು ಪಂದ್ಯ ಗೆದ್ದುಕೊಂಡಿರುವುದಾಗಿ ಭಾವಿಸಿದ್ದರು. ಆದರೆ, ಅಂತ್ಯದಲ್ಲಿ ರೆಫ್ರಿ ಕೆಂಪು ಸಮವಸ್ತ್ರ ತೊಟ್ಟ ವೆಲೆನ್ಸಿಯಾ ಅವರ ಕೈ ಮೇಲೆತ್ತಿದಾಗ ಕೋಮ್ ಕಣ್ಣಲ್ಲಿ ನೀರು ಹರಿಯಲಾರಂಭಿಸಿತ್ತು. ಆದರೂ ನಗುತ್ತಲೇ ಎಲ್ಲರಿಗೂ ಧನ್ಯವಾದ ಹೇಳಿ ಎದುರಾಳಿಗೆ ಅಪ್ಪುಗೆಯನ್ನೂ ನೀಡಿ ಹೊರನಡೆದರು.
ಕಳೆದ ಎರಡು ಮುಖಾಮುಖಿಗಳಲ್ಲಿ ಕೋಮ್ ಎದುರು ಸೋತಿದ್ದ ವೆಲೆನ್ಸಿಯಾ, ಈ ಬಾರಿ ತಮ್ಮ ತಂತ್ರಗಾರಿಕೆ ಕೊಂಚ ಬದಲಾವಣೆ ಮಾಡಿಕೊಂಡಂತೆ ಕಂಡುಬಂದರು. ತಮ್ಮ ಎತ್ತರದ ಲಾಭ ಪಡೆದು ಕೋಮ್ ಅವರ ಬಲಿಷ್ಠ ಪಂಚ್‌ಗಳ ಹೊಡೆತದಿಂದ ಪಾರಾದರಲ್ಲದೆ, ಎಡ ಮತ್ತು ಬಲ ಹುಕ್‌ ಹೊಡೆತಗಳ ಮೂಲಕ ಅಂಕ ಕಲೆಹಾಕುವಲ್ಲಿ ಸಫಲರಾದರು.
“ನನಗೆ ಈ ಸ್ಕೋರಿಂಗ್‌ ವ್ಯವಸ್ಥೆ ಅರ್ಥವಾಗುತ್ತಿಲ್ಲ. ಮೊದಲ ಸುತ್ತಿನಲ್ಲಿ ಮೇರಿ 1-4ರಲ್ಲಿ ಹಿನ್ನಡೆ ಅನುಭವಿಸಿದ್ದಾರೂ ಎಲ್ಲಿ ಎಂಬುದು ಅರ್ಥವಾಗುತ್ತಿಲ್ಲ. ಆ ಸುತ್ತಿನಲ್ಲಿ ಎಲ್ಲಿಯೂ ಅಂತಹ ಅಧಿಕಾರಯುತ ಆಟ ವೆಲೆನ್ಸಿಯಾ ಅವರಿಂದ ಬರಲೇ ಇಲ್ಲ,” ಎಂದು ರಾಷ್ಟ್ರೀಯ ಸಹಾಯಕ ಕೋಚ್ ಹಾಗೂ ಮೇರಿ ಕೋಮ್ ಅವರ ಆಪ್ತ ತರಬೇತುದಾರ ಛೋಟೇ ಲಾಲ್‌ ಯಾದವ್‌ ಪಿಟಿಐ ಸುದ್ದಿ ಸಂಸ್ಥೆಗೆ ತಿಳಿಸಿದ್ದಾರೆ.
ಇದಕ್ಕೂ ಮುನ್ನ 2019ರ ವಿಶ್ವ ಚಾಂಪಿಯನ್‌ಷಿಪ್‌ನ ಕ್ವಾರ್ಟರ್‌ ಫೈನಲ್ ಪಂದ್ಯದಲ್ಲಿ ಮೇರಿ ಕೋಮ್ ಸುಲಭವಾಗಿ 32 ವರ್ಷದ ವೆಲೆನ್ಸಿಯಾ ಎದುರು ಗೆದ್ದಿದ್ದರು. ಅಂದಹಾಗೆ ಕೊಲಂಬಿಯಾದಿಂದ ಒಲಿಂಪಿಕ್ಸ್‌ ಬಾಕ್ಸಿಂಗ್‌ನಲ್ಲಿ ಸ್ಪರ್ಧಿಸುತ್ತಿರುವ ಮೊದಲ ಬಾಕ್ಸರ್‌ ಎಂಬ ಹೆಗ್ಗಳಿಕೆ ವೆಲೆನ್ಸಿಯಾ ಅವರದ್ದು. 2016ರ ರಿಯೋ ಒಲಿಂಪಿಕ್ಸ್‌ನಲ್ಲಿ ಅವರು ಕಂಚಿನ ಪದಕ ಗೆದ್ದ ಸಾಧನೆಯನ್ನೂ ಮಾಡಿದ್ದಾರೆ.
